उद्यमीको व्यापक दबाबपछि सिमेन्टको मूल्य घटाए

अस्वभाविक रुपमा मूल्यबृद्धि गरेका उद्यमीले चौतर्फी आन्दोलन भएपछि सिमेन्टको मूल्य घटाएका छन् । यसअघि १५ दिनको अबधिमा ५ पटकसम्म मूल्यबृद्धि बढाएर आलोचन खेपेका उद्यमीले फेरी मूल्य घटाउने निर्णय गरेका हुन् ।
आपूर्ति व्यवस्थापन तथा उपभोक्ता हित संरक्षण विभागका अनुसार शिवम् सिमेन्टले प्रतिबोरा २३ रुपैयाँ मूल्य घटाएको छ । अब उक्त सिमेन्टको प्रतिबोरा मूल्य आठ सय ८७ मा झरेको छ । उक्त सिमेन्टले १५ प्रतिशतसम्म मूल्य बढाएको थियो । त्यस्तै, अम्बे सिमेन्ट उद्योगले प्रतिबोरा २० रुपैयाँ मूल्य घटाएको छ । उक्त सिमेन्टले प्रतिबोरा एक सय १० रुपैयाँ मूल्य बढाएको थियो । अब यो सिमेन्टको प्रतिबोरा मूल्य सात सय ४० रुपैयाँमा झरेको छ । यसैगरी सर्वोत्तम र नारायणी सिमेन्टको मूल्य प्रतिबोरा १०र१० रुपैयाँले घटेको छ । अब नारायणी सिमेन्टको मूल्य आठ सय ८० र सर्वोत्तमको आठ सय ३५ रुपैयाँ पर्नेछ । हेटौंडा सिमेन्टलाई पनि मूल्य घटाउन पत्राचार गरिएको विभागले जनाएको छ ।

जगदम्बा छडले पनि मूल्य घटाउने प्रतिवद्धता जनाएको विभागको भनाइ छ । यसअघि शालिमारले १६ प्रतिशत, हेटौंडाले १३ प्रतिशत, निर्माणले साढे १२ प्रतिशत, अग्निले साढे १० र मारुती सिमेन्टले ६ प्रतिशत मूल्य बढाएका थिए । त्यस्तै, हामा छडले आठ दशमलव सात प्रतिशत, जगदम्बा छडले सात प्रतिशत र शाखः छडले चार दशमलव सात प्रतिशत मूल्य बढाएका थिए । अस्वभाविक मूल्यवृद्धि गरेपछि विभागले बजार अनुगमन गरेर मूल्य घटाउन उद्योगीलाई दवाव दिएको थियो । विभागले गरेको अध्ययन प्रतिवेदनले उद्योगीले १७ प्रतिशतसम्म भाउ बढाएका देखाएको थियो । भारत र चीन लगायतका मुलुकबाट आउने कच्चा पदार्थ महंगिएको कारण देखाउँदै करिब डेढ महिनाअघिदेखि निर्माण व्यवसायीहरूले सिमेन्ट र छडको मूल्यवृद्धि गरेका थिए । उद्योगीले बढाएको मूल्य अस्वभाविक भएको दावी गर्दै विभागले साविककै मूल्य कायम गर्न सुझाव दिएको थियो ।

मूल्य घटाउन सरकारले दबाब दिएपछि सिमेन्ट उत्पादक संघले मूल्य घटाउन सबै उद्योगीलाई पत्राचार गरेको थियो । विभागका महानिर्देशक कुमार दाहालले मूल्य बढाएका सबै सिमेन्ट र छड उद्योगले मूल्यमा केही समायोजन गर्ने प्रतिवद्धता जनाएका बताए । यो मूल्य पनि थप घट्ने विभागको दावी छ । ‘पछिल्लो समय इन्धनको मूल्य, श्रम ज्याला, कच्चा पदार्थ र क्लिङ्कर लगायतको पनि मूल्य बढेको आधारमा केही मूल्य बढ्नु स्वभाविक भए पनि उद्योगीले अत्यधिक मूल्य बढाएका थिए,’ उनले भने, ‘थोरै भए पनि मूल्य घटाएका छन्, यो सकारात्मक हो ।’