चितुवाको छालासहित ३ जना पक्राउ

५ माघ, काठमाडौं । दुर्लभ वन्यजन्तु चितुवाको छालासहित काठमाडौंको न्यूरोडस्थित भूगोल पार्कबाट प्रहरीले ३ जनालाई पक्राउ गरेको छ ।
बैतडी घर भएका २५ वर्षीय महेशराज औजी, ३४ वर्षीय जनक महरा र २५ वर्षीय सुरेन्द्र दयाल पक्राउ परेका छन् ।
प्रहरीलाई उनीहरुको गतिविधि शंकास्पद लागेपछि चेकजाँच गर्दा कलेजी रंगको झोलाभित्र बोरामा प्याक गरेको अवस्थामा चितुवाको छाला बरामद भएको थियो । उनीहरुले विक्री गर्ने उद्देश्यले चितुवाको छाला बोकेको खुलेको छ ।

उनीहरुमाथि थप अनुसन्धान र कारबाहीका लागि जिल्ला वन कार्यालय, हात्तिसार पठाइएको महानगरीय अपराध अनुसन्धान महाशाखा, टेकुले जनाएको छ ।