मिटरब्याजीलाई अब कारबाही गरिने ,, राष्ट्रपतिद्धारा विधेयक प्रमाणीकरण

न्यायको लागि महिनौंदिन देखि भौतारिरहेका मिटरब्याज पिडितहरुको लागि अब न्यायको बाटो खुलेको छ । मिटरब्याजीलाई कारबाही गर्न ल्याइएको विधेयक राष्ट्रपति रामचन्द्र पौडेलले प्रमाणीकरण गरेका छन् । राष्ट्रपति कार्यालयले विज्ञप्तीमार्फत ‘मुलुकी संहितासम्बन्धी केही नेपाल ऐनलाई संशोधन गर्न बनेको विधेयक २०८०’ राष्ट्रपतिद्धारा प्रमाणीकरण भएको जानकारी गराएको छ । राष्ट्रपतिले प्रमाणीकरण गरेसँगै विधेयकले कानुनी रुप लिएको छ । अब विधेयक राजपत्रमा प्रकाशित भएपछि कार्यान्वयनमा जानेछ । विधेयकमा कम रकम दिइ बढीको लिखत बनाउने, रकम नै नदिइ लिखत बनाउने, आपसी लेनदेनको ब्याजलाई मूल ऋणमा जोड्ने तथा त्यस्तो लेनदेनका आधारमा चलअचल सम्पत्ति हडप्नेहरूलाई सात वर्षसम्म कैद र ७० हजार रूपैयाँसम्म जरिबाना हुने कानुनी व्यवस्था गरिएको छ ।।