राष्ट्रपति र प्रधानमन्त्रि बिच भेटवार्ता, के होला अध्यादेश बारे निर्णय

१४ पुस, काठमाडौं । कार्यसम्पादन समितिको बैठकलाई रोकेर राष्ट्रपति विद्यादेवी भण्डारीलाई भेट्न शितल निवासमा पुग्नुभएका नेपाली कांग्रेसका सभापति एवम् प्रधानमन्त्री शेरबहादुर देउवा परामर्श पश्चात् पुनः बैठकमै फर्किनुभएको छ ।
राष्ट्रपति भण्डारीले शुक्रबार बिहान एमाले अध्यक्ष केपी शर्मा ओलीसँग पनि परामर्श गर्नुभएको थियो । ओलीसँगको भेटवार्ता सकिएलगत्तै उहाले प्रधानमन्त्री देउवालाई शितल निवासमा बोलाउनुभएको हो ।
राष्ट्रपति भण्डारीले राष्ट्रियसभा अध्यादेश गठन सम्वन्धमा परामर्श गर्न बोलाएकाले सभापति देउवा शितल निवास पुग्नुभएको कांग्रेस नेता डा. प्रकाशशरण महतले जानकारी दिनुभयो ।
सरकारले राष्ट्रपतिसमक्ष पेश गरेको अध्यादेशमा उल्लेख भएको एकल संक्रमणीय प्रणालीको सट्टा बहुमतीय प्रणाली राख्न प्रमुख प्रतिपक्षी नेकपा एमालेले माग गर्दै आएको छ । तर कांग्रेसले भने सरकारले पेश गरेको अध्यादेश संवैधानिक राष्ट्रपतिले स्वीकृत गर्ने संवैधानिक जिम्मेवारी भएको तर्क गर्दै आएको छ ।

कांग्रेस नेता डा. महतले राष्ट्रपति भण्डारीले जस्ताको तस्तै अध्यादेश प्रमाणीकरण गर्ने विश्वास व्यक्त गर्नुभयो । उहाले समानुपातिक सांसदको सूची पनि चाँडै तयार पारेर निर्वाचन आयोगमा पेश गर्ने बताउनुभयो ।

२०७४ पुष १४ गते १२ ः ३० मा प्रकाशित